Tuesday, December 31, 2013

எவ்வளவு தூரம்

உன்னிடமிருக்கிறது
பிடிவாதம்
என்னிடமிருக்கிறது
வைராக்கியம்
இதை வைத்துக்கொண்டு
எவ்வளவு தூரம்
பயணம் செய்யப் போகிறோமோ
தெரியவில்லை 

Sunday, December 29, 2013

விளிம்பில்

உன் எதிர்பார்ப்பையும் 
என்னால்
பூர்த்தி செய்ய முடியவில்லை 

என் எதிர்பார்ப்பையும் 
என்னால் 
பூர்த்தி செய்ய முடியவில்லை 

ஆனாலும் 
விளிம்பில் நின்று 
பேசிக் கொண்டிருந்தோம்
குதித்து விடாமல்

Friday, December 27, 2013

உனக்கும் கேட்கும்

அன்பால் அடைந்து விடலாம் 
என்று யாரோ 
எழுதிவிட்டுப் போன வரியை 
உரக்கப் படிக்கிறேன்
உனக்கும் கேட்கும் என 

Sunday, December 15, 2013

விடாமல் பெய்யும் கனவு

விட்டு விட்டுப்
பெய்யும் மழை
விடாமல்
பெய்யும் கனவு
இந்த உன்
குறுஞ்செய்தியில்
நீ
மழையாய்
கனவாய்
நானாய் 

Thursday, November 28, 2013

யாருக்கும் தெரியாமல்

யாருக்கும் தெரியாமல் 
உன் இருக்கைக்கு 
நான் வைத்து விட்டு 
வந்த முத்தம் 
உன்னோடு 
பயணம் செய்யக் கூடும் 

Saturday, November 2, 2013

நான் கடலாகிறேன்

உள்ளங்கையில் 
முத்தம் வைக்கிறாய் 
அது கப்பலென 
நகர்கிறது 
நான் கடலாகிறேன்

Thursday, October 24, 2013

யாரோ நீ

யாரோ நீ
சூரியன் இறங்கும்
வெளியில்
தொலைவில்
நடந்து போகிறாய்
என் மனதில் அழுத்தமாய்
பதிந்து போயிருக்கின்றன
உன் சுவடுகள் 

Monday, October 21, 2013

ஏதேனும் ஒரு வரியில்

ஏதேனும் ஒரு வரியில் 
உன்னை 
சந்தித்து விடுவேன் 
ஏதேனும் ஒரு வழியில்  
முடியாமல் போனாலும் 

Wednesday, September 11, 2013

மெளனத்தைக் குழைத்தபடி

தனிமையை நானும் 
என்னைத் தனிமையும் 
வரைந்து கொண்டிருக்கிறோம் 
வண்ணங்களாய் 
மெளனத்தைக் குழைத்தபடி

Thursday, September 5, 2013

கடந்து விடுவேன்

மெல்ல நினைவுகளிலிருந்து 
நீ வடிந்து விடுவாய் 
நான் இந்த மழையைக் 
கடந்து விடுவேன்

Saturday, August 24, 2013

கவனித்தாயா

உன் மனதின் அருகில்
நான் பூத்திருப்பதை
கவனித்தாயா 

வெற்றிடம்

மௌனங்களால்
நிரப்புகிறாய்
வெற்றிடம்
பூக்கிறது 

Sunday, August 18, 2013

தெரியும்

நீ வருவாய் 
தெரியும் 
காத்திருப்பைப்
பாடலாக்குகிறேன் 

Sunday, July 28, 2013

சொற்களின் ரத்தம்

அமைதியின் சிலுவையில் 
உன்னை 
அறைந்து கொள்கிறாய் 
சொற்களின் ரத்தம் கசிகிறது

Thursday, March 21, 2013

படிதல்

நான் புல்
நீ என் மேல்
படிந்திருக்கும் 
வானவில்

Wednesday, March 20, 2013

அப்படியே


நீ பேசுகிறாய் 
உன் மெளனத்தில் 
நான் எழுதி வைத்ததை 
அச்சு பிசகாமல் 
அப்படியே

Tuesday, March 19, 2013

வண்ணங்கள்


பல நூறு வண்ணங்கள்
உன் கண்களில்
எடுத்து வரைய
எனக்குதான்
தெரியவில்லை                                                                

Monday, March 18, 2013

குழந்தை


எழுதவுமில்லை 
வரையவுமில்லை 
பென்சிலோடு 
விளையாடும் 
குழந்தை

Thursday, March 14, 2013

கண்ணீரில்


உன் கண்ணீரில் 
வானவில் ஒளிர்கிறது 
என்கிறேன்
புன்னகைக்கிறாய்

Monday, March 11, 2013

தனிமையின் மேல்


இந்த தனிமையின் மேல் 
நீ அன்பு நீரூற்றிப் 
போனச் செடி 
வளர்ந்து கொண்டிருக்கிறது

Wednesday, March 6, 2013

கனவில் வந்த பழம்


கனவில் வந்த பழம்
ஆப்பிள் என்று
தெரிந்து கொண்ட போது
அதை உண்ட சந்தோஷம்
கொண்டாள் குழந்தை

Tuesday, March 5, 2013

இரண்டிலும்


அடுக்கி வைக்கிறாள் 
கலைத்துப் போடுகிறாள் 
குழந்தை 
இரண்டிலும் 
அழகிருக்கிறது

Saturday, March 2, 2013

தேடுதல்


என் தேடுதலின் அடியில்
நீ ஊர்ந்து கொண்டிருக்கிறாய்
மண்புழு என

மணல்துகள்


நீ அகல்
உன்னால் ஒளிரும்
நான் மணல்துகள்

Sunday, January 27, 2013

தொட முடியாத தூரத்திற்கு


நீ நட்சத்திரம் என்றேன்
குழந்தையை

தொடுங்கள் பார்க்கலாம்
எனச் சொல்லியபடியே
ஓடுகிறாள்
தொட முடியாத
தூரத்திற்கு

ஏணி


குழந்தை வரைந்த ஏணியில்
கடவுள் இறங்கி வந்தார்
குழந்தைக்கு
ஒரு முத்தம் வைத்துவிட்டு
மறைந்து விட்டார்

Sunday, January 6, 2013

கண்களில்


உன்னைக் கண்களில்
எடுத்துக்கொண்டு திரும்புகிறேன்
மறு முறை
சந்திக்கும் வரை
நீ தீர்ந்து போகாமல்
இருக்க வேண்டும்