Sunday, December 13, 2015

மனதின் அழகு

நான் அப்படி ஒன்றும்
அழகில்லையே
எப்படி என்னை 
அழகாகப் படம் எடுத்தீர்கள்
அவள் கேட்டாள்

உங்கள் மனதின் அழகைப்
புன்னகையில் 
வரச் செய்தேன்
அவ்வளவுதான்
என்றார் புகைப்படக்காரர்


Wednesday, November 4, 2015

சிதறிய சொற்கள்

நீ கைக்குட்டையை
உதறிய போது
சிதறிய சொற்களை
உனக்குத் தெரியாமல்
எடுத்துக் கொண்டேன்

அவைகளை
வரிசைப்படுத்திய போது
வாக்கியமானது

வளைத்த போது
வானவில்லானது

ஊதிய போது
பறந்து போனது

கை பிசைந்து நிற்கிறேன்

கடைசி ஒன்றை
செய்யாமல்
இருந்திருக்கலாமென்று

Wednesday, October 7, 2015

காதலில் நனைந்தபடி

உன் குடையில்
நானும் வரலாமா
அவன் கேட்டான்

உன் மழையில்
நானும் நனையலாமா
அவள் கேட்டாள்

முதியவர் கையில்
குடை இருக்க
காதலில் நனைந்தபடி
இருவரும் போனார்கள்

Friday, October 2, 2015

உன் முகவரி

உன் முகவரி
கையில் இருக்கிறது
ஒரு வழிப்போக்கனைப் போல
உன் வீடுதாண்டிப் போகிறேன் 

Friday, September 11, 2015

அல்லது

காமம் காதலின் கழுத்தை
நெரித்துக் கொன்று விட்டது
என்ற வரியை எழுதியது
நானா         
அல்லது
எழுதச் சொன்னது
காமமா
காதலா

Friday, July 17, 2015

சொற்கள்

களைப்படையும்
என் கால்கள்
உன்னை சந்திக்காமல்
திரும்பி விடலாம்
என் சொற்கள்
பறந்தேனும் வந்து
உன் மடி அமரும்

Thursday, July 16, 2015

இப்போது

உன் கண்களில்
காமம் இருக்கிறது
உன் இமைகள்
அசைந்து அசைந்து
அதைக் காதலாக
மாற்றி விடுகிறது
இப்போது
உன் பார்வையில்
நான் காதலைக் காண்கிறேன்

Thursday, February 19, 2015

நீ வந்த போது

நீ வந்த போது 
நான் உறங்கிக் கொண்டிருந்தேன் 
அருகில் வந்து
மூச்சுக் காற்றால்
ஒரு குறிப்பெழுதிவிட்டுப் 
போய் விட்டாய்

Sunday, February 8, 2015

உன் வீடு

நான் வந்து சேர்ந்த 
இடத்தில் 
உன் வீடு இருந்தது 
பின் அது 
தொலைவாகிப் போனது 

Tuesday, February 3, 2015

வேறு பதில்

வேறு பதிலோடு 
நீ வரக்கூடும் 
என் கேள்வி உடைந்து 
அழக்கூடும்

வாசனை

உன் கண்களில் 
காதல் வாசனை 

முகர்ந்து பார்த்தா 
சொல்கிறாய் 

உணர்ந்து பார்த்து 
சொல்கிறேன்

Monday, January 5, 2015

பின் அட்டையில் சிரிக்கும் பெண்

பின் அட்டையில் 
சிரிக்கும் பெண்ணை 
எங்கோ பார்த்திருக்கிறேன் 
என்ற மயக்க உணர்வோடு 
மேலும் ஒரு முறை 
பார்க்கிறேன் 
இன்னும் ஒரு முறை 
சிரிக்கிறாள்

Sunday, January 4, 2015

உன் சாலையில்

நீ இல்லை என்று 
தெரிந்தும் 
பார்க்க வந்தேன் 
உன் சாலையில் 
திரும்பிப் போவது 
உன்னைச் சந்தித்துப் 
போவது போல் 
சந்தோஷம் தருகிறது

Friday, January 2, 2015

சொற்கள்

எனக்கான சொற்கள் 
உன்னிடமும் 
உனக்கான சொற்கள் 
என்னிடமும் 
இருக்கின்றன 
நாம் ஏன் 
பேசாமல் இருக்கிறோம் என்று 
தெரியவில்லை