Monday, October 27, 2008

...பார்த்து

பறிக்க நினைத்த கை
திரும்புகிறது
பழத்தின் புன்னகை பார்த்து

...பெருமழை

அசுர பசியுடன்
பெருமழை
ஆஸ்ட்ரேயில்
குவியும் சிகிரெட்
தட்டச்சில்
படபடக்கும்
முடியாத கவிதை

Sunday, October 26, 2008

.....

எதுவுமில்லை
நம்பிக்கையற்றவன்
நாட்குறிப்பில்

Saturday, October 25, 2008

நினைவுகள் தீர்ந்தபாடில்லை

உன்னை
மறந்து கொண்டிருக்கிறேன்
நினைவுகள் தீர்ந்தபாடில்லை

Friday, October 24, 2008

கிழிந்த பக்கங்கள்

குப்பை பொறுக்கும் சிறுவன்
எழுத்துக் கூட்டிப்படிக்கிறான்
பொறுக்கிய காகிதத்தின்
கிழிந்த பக்கத்தை

Tuesday, October 14, 2008

கை அள்ளும் நீர்

கை அள்ளிய நீரில்
கடவுளும் இருந்தார்
தன் தாகத்தைத்
தீர்த்துக்கொள்ள

Monday, October 13, 2008

அன்பின் அகராதி

வெட்டிய மரத்தை
கூறு போட்டார்கள்
நிறைய மரணங்கள்
-----
மீன் படிக்கும் கடல்
முடியவில்லை
தண்ணீர் பக்கங்கள்
------
ஒவ்வொரு முறையும்
ஒரு புன்னகை தருகிறாய்
உருவாகிறது
அன்பின் அகராதி
------

Saturday, October 11, 2008

...கயிறு

தற்கொலை
செய்துகொள்ளும் முன்பே
இறந்து போனேன்
ஏமாற்றத்துடன் பார்க்கிறது
தூக்குக்கயிறு

சிங்கமும் சுண்டெலியும்

சிங்கம் தூங்காது
சுண்டெலிதான் தூங்கும்
நீ சிங்கமா சுண்டெலியா
மகனிடம் கேட்டேன்
உடனே சொன்னான்
நிறைய சிங்கம்
கொஞ்சம் சுண்டெலி

Monday, October 6, 2008

வெள்ளை தாளில்...

எழுதாத கவிதையிலிருந்து
உதிர்ந்துகொண்டே இருந்தன
வார்த்தைகள்
முற்றாக வடிந்த
வெள்ளை தாளில்
படபடக்கும் நிசப்தம்

Friday, October 3, 2008

என்னை
நகர்த்தும்
நான்

...என்றாள்

என்னை உனக்கு
எதற்காக பிடிக்கிறது
கேட்டேன்
காரணங்களை சொல்ல
பிடிக்கவில்லை என்றாள்
குழந்தை ஆனந்ததில்
பெரிதாகும் பலூன்
அச்சம் எனக்கு

...காலண்டர் பெண்

ஒன்று
இரண்டு மூன்று
நான்கு
ஜந்து ஆறு ஏழு
எட்டு
ஒன்பது
பத்து என
தொடரும் சிகிரெட்டுகளுடன்
முடிகிறது
பகல்பொழுது
இருமலின் அதிர்வை
கேட்டபடி ஆஸ்ட்ரே
விரைத்த கண் பார்க்க
எப்போதும் போல்
காமம் வீசுகிறாள்
காலண்டர் பெண்
காற்றில் அசைந்து

இந்த முறை...

இந்த முறையும்
விழுந்தேன்
சென்ற முறையை விட
வேகமாக எழுந்தேன்