வரிகளில்

மரணத்திலாவது சந்திப்பாயா 

என்று நீ எழுதிய வரிகளில் 

இறந்து போனேன். 

எப்படி சந்திக்க?

சந்தித்தோம்

நீண்ட 

நாட்களுக்குப் பிறகு 

சந்தித்தோம் 

நீ கண்ணீரோடு 

வந்திருந்தாய் 

நான் கனவுகளோடு 

வந்திருந்தேன்

ஆடுதல்

நினைவுகளின் மேல் 

குதித்தாடுகிறாய் 

இறக்கி வைத்தால் 

நினைவுகளாக 

குதித்தாடுகிறாய்

அலை

கால் நனைக்கும் அலை 

உன் ஞாபகத்தைக் 

கொண்டு வரும்

கண் தவழும் அலை 

உன் ஞாபகத்தில் 

மூழ்கி எழும்

நனைதல்

நீயும் 

நனைந்து வந்தாய் 

நானும் 

நனைந்து வந்தேன் 

மழையும் 

நனைந்து வந்தது

உரையாடல்

உரையாடலைத் துவக்கி வைக்க 

சக்கரை இல்லாதக் காப்பியைத் தருகிறாய்

உரையாடலை முடித்துக் கொள்ள 

அமைதியாகக் குடிக்கிறேன்

கிளம்பும் போது கேட்கிறாய்

காப்பியில் சக்கரை எல்லாம் 

சரியாக இருந்ததா என்று

நான் காப்பி நன்றாக இருந்தது 

என்கிறேன்

இந்த வரியின் சுவையில் 

நீ மெளனமாகிறாய் 

நான் வெளியேறுகிறேன்

உன்னை

விரிந்து கிடக்கும் 

வெள்ளைத்தாளில் 

எங்கே இருக்கிறாய் 

என் எழுத்து 

தேடத் தொடங்குகிறது 

உன்னை