கை பிடித்து

1-

மழலையால்
மொழியை அழைக்கிறது
குழந்தை

2-

தொலைந்த குழந்தை
மெல்ல அழுகை நிறுத்தி
நடக்கிறது
நகரத்தின்
கை பிடித்து

வலி

1-
பயண ஜன்னல்
நினைவுகளைப் போல
கடந்து போகும் மரங்கள்
2-
துண்டிக்கப்பட்ட உணர்வில்
கசிகிறது வலி
ரத்தம் போல

தூரம்

வந்து சேர்ந்த பின்னும்
நமக்கிடையில்
உள்ள தூரத்தைக்
கடந்து கொண்டிருந்தோம்

உனது பெயர்

உன் பெயரை
ஊதிப் பார்க்கிறேன்
பூக்களாக

உதிர்ந்த பூக்களை
கோர்த்துப் பார்க்கிறேன்
உன் பெயராக

தாஜ்மஹாலும் காதல் மனைவியும்

தாஜ்மஹால் அருகில் நின்று
புகைப்படம்
எடுத்துக் கொள்ளவேண்டும் என்று
காதல் மனைவி அடிக்கடி
கோரிக்கை வைக்கிறாள்
கண்ணைக் கசக்குகிறாள்
போட்டோ ஸ்டுடியோவில்
தாஜ்மஹால் இருக்கும்
போய் எடுத்துக் கொள்ளலாம் என்றால்
கேட்க மாட்டேன் என்கிறாள்
ஆக்ராதான் போக வேண்டும்
என்று அடம் பிடிக்கிறாள்

கடந்து போனவர்கள்

நடந்த போது
எத்தனையோ பேர்
கடந்து போனார்கள்

அவர்களுக்கு
நானும் ஒருவனாகத்தான்
அப்படிப் போயிருப்பேன்

வார்த்தைகள்

வந்து சேராமல்
அங்குமிங்குமாய்
பாதரசம் போல் உருள்கின்றன
வார்த்தைகள்