நீ

நீ கனவுகளுடன் 
உறங்கிக்கொண்டிருக்கிறாய் 
நான் சொற்களுடன் 
விழித்திருக்கிறேன்

எழுத எழுத

1-
எழுத எழுத

விரிகிறாய்
வானம் போல

2-

உன்னை எழுத்தில்

வரைந்து விடுவதால்
படிக்கவும் முடிகிறது
பார்க்கவும் முடிகிறது

3-

உன் கண்கள்

காதல் வங்கி
அதில் என்
கனவுகளைப்
போட்டு வைத்திருக்கிறேன்

குழந்தை

எனக்கும்
 எழுதத் தெரியும்
 என்கிறது குழந்தை
 கிறுக்கியபடி

கடல் வரையும் குழந்தை

மீன் தொட்டியும்
மீன்களும்
வரையச் சொல்கிறார் அப்பா

கடல் வரைகிறாள் குழந்தை

காரணம் கேட்கிறார் அப்பா

வண்ணமாய் சிரித்து
விளக்குகிறாள் குழந்தை

இதுல
பல்லாயிரக்கணக்கான மீன்களும்
ஆயிரக்கணக்கான மீன் தொட்டிகளும்
இருக்குப்பா

ஜன்னல் சாரல்

நனையாதே வா என்று
அம்மா இழுத்து வந்து விட
ஜன்னல் சாரலை
மழையாக்கும் குழந்தை

அம்மாவின் முத்தத்தில்

அம்மாவின் முத்தத்தில்
காலத்தின் ஈரமும்
கலந்திருக்கிறது
அதனால்தான்
இது இன்னும்
காயாமல் இருக்கிறது

அதிக ஆயுளுடன்

குளிர்சாதனப் பெட்டிக்குள்
வைக்கப்பட்டிருக்கும்
பழங்களைப் போல
உன் குறுஞ்செய்திகள்
என் அலைபேசிக்குள்
அதே சுவையுடன்
அதிக ஆயுளுடன்