ஒன்றுதான்

என் உணர்வின் தும்பிக்கையும்
யானையின்  தும்பிக்கையும்
ஒன்றுதான்
அப்போது
யானை நானாகவும்
நான் யானையாகவும்

     - ராஜா சந்திரசேகர் 

இன்று (04.04.2018)வந்துள்ள ஜூனியர் விகடனில்...

மிதந்து...

உன் புன்னகையைச்
சுமந்துகொண்டு
மிதந்து போகிறேன்

அலகில்

தன் அலகில்
மௌனம் எடுத்துவரும் பறவை 
என் உலகில் 
வைத்துவிட்டுப் போகிறது

விழும்

இமை விரிய
உள்நுழைந்த காட்சி
மனதில் விழும் 

பதினோராம் நூற்றாண்டில்

பதினோராம் நூற்றாண்டில்

இந்த நூலகத்தில்

தொலைந்து போனவர் 

இன்று நான்

படித்துக்கொண்டிருக்கும் 

புத்தகத்திலிருந்து 

என்னோடு பேசிக்கொண்டிருக்கிறார்

      -

அன்பின் நிறம்

எந்த நிறம் 

உங்களுக்குப் பிடிக்கும் 

அன்பின் நிறம்

கேள்வி/பதில்

நீங்கள் எதிர்பார்க்கும் பதில்
உங்கள் கேள்விக்கான
பதில் அல்ல

நீங்கள் வைத்திருக்கும் கேள்வி
உங்களுக்கான கேள்வி அல்ல

   

அந்த அறையில்...

அந்த அறையில் ஒரு பியானோ இருந்தது

அதில் காலத்தின் தூசி படிந்திருந்தது

வாசிக்கத்தெரியாத ஒருவன் இருந்தான்

அவனோடு ஒரு நாய் இருந்தது

கூடவே இறந்துகொண்டிருக்கும் ஒரு முதியவள் இருந்தாள்

அவள் குளிரை தன் நடுக்கத்தால் விரட்டிக்கொண்டிருந்தாள்

அவன் பசித்த விரல் பியானோ கட்டையில் மோத
சத்தம் வருகிறது

உயிர் இருக்கிறது உயிர் இருக்கிறது என்று அவன் கூவியபடியே
முதியவளை சுற்றி வருகிறான்

நாய் குரைக்கிறது

அவள் இறந்து கொஞ்ச நேரமாகிறது

பெரிது

எதைப் பெரிதென்று 

நினைக்கிறீர்கள் 

சிறிதின் சிறிதை

அன்பெனும் பிரபஞ்சம்

உன் குறுஞ்செய்திகளில்
குவிந்திருப்பதை
அன்பெனும் பிரபஞ்சம்
என்ற தலைப்பில்
ஆயிரம் பக்கங்கள் எழுதலாம்

என்னவும் செய்.பிசாசே!

உன் கையைப்
பிடித்துக் கொள்ளவா!

பிடித்துக்கொண்டுதானே இருக்கிறாய்!

ஆமால்ல!
சரி இறுக்கமாகப்
பிடித்துக்கொள்ளவா!

என்னவும் செய்.பிசாசே!
அப்போதாவது
உன் வெட்கம்
வெளியேறுகிறதா..பார்க்கலாம்!

மனதின் அழகு

நான் அப்படி ஒன்றும்

அழகில்லையே

எப்படி என்னை 

அழகாகப் படம் எடுத்தீர்கள்

அவள் கேட்டாள்

உங்கள் மனதின் அழகைப்

புன்னகையில் 

வரச் செய்தேன்

அவ்வளவுதான்

என்றார் புகைப்படக்காரர்

சிதறிய சொற்கள்

நீ கைக்குட்டையை
உதறிய போது
சிதறிய சொற்களை
உனக்குத் தெரியாமல்
எடுத்துக் கொண்டேன்

அவைகளை
வரிசைப்படுத்திய போது
வாக்கியமானது

வளைத்த போது
வானவில்லானது

ஊதிய போது
பறந்து போனது

கை பிசைந்து நிற்கிறேன்

கடைசி ஒன்றை
செய்யாமல்
இருந்திருக்கலாமென்று

காதலில் நனைந்தபடி

உன் குடையில்
நானும் வரலாமா
அவன் கேட்டான்

உன் மழையில்
நானும் நனையலாமா
அவள் கேட்டாள்

முதியவர் கையில்
குடை இருக்க
காதலில் நனைந்தபடி
இருவரும் போனார்கள்

உன் முகவரி

உன் முகவரி
கையில் இருக்கிறது
ஒரு வழிப்போக்கனைப் போல
உன் வீடுதாண்டிப் போகிறேன் 

அல்லது

காமம் காதலின் கழுத்தை

நெரித்துக் கொன்று விட்டது

என்ற வரியை எழுதியது

நானா         

அல்லது

எழுதச் சொன்னது

காமமா

காதலா

சொற்கள்

களைப்படையும்
என் கால்கள்
உன்னை சந்திக்காமல்
திரும்பி விடலாம்

என் சொற்கள்
பறந்தேனும் வந்து

உன் மடி அமரும்

இப்போது

உன் கண்களில்
காமம் இருக்கிறது
உன் இமைகள்
அசைந்து அசைந்து
அதைக் காதலாக
மாற்றி விடுகிறது
இப்போது
உன் பார்வையில்
நான் காதலைக் காண்கிறேன்