மழையில்

யாருக்கும் தெரியாது
என்றெண்ணி
நடந்தேன் மழையில்

மழைக்குத் தெரிந்தது
அது என்னைக் கேட்டது

நீயேன் அழுகிறாய்

என்னை

மன்னிக்கிறேன்
ஒவ்வொரு முறையும்
என்னை

நீங்களும்

நான் எழுதும் கதையில்
நீங்களும்
உங்கள் கதையை
எழுதியபடி

மீட்டெடுத்தல்

அடைபட்ட வார்த்தைகளை
மீட்டெடுக்க வேண்டும்
கவிதையிலிருந்து

கூடவே வந்த மழை

கூடவே வந்த மழை
பயணத்தை முடித்திருந்தது
ஜன்னல் கம்பிகளில்
துளிகளை விட்டு விட்டு

நீ

ஊதி ஊதி
நீ அணைத்து
கொண்டு போனாய்
ஒளியை

மோதி மோதி
நான் உடைத்து
கடந்து போனேன்
இருளை

பழகு

தப்புதப்பாக
கணக்குப் போட்டாலும்
புன்னகைத்தபடியே
திருத்தி
சொல்லிக் கொடுப்பார்
கணக்கு வாத்தியார்

பிரம்பு பயன்படுத்தாத
அவர் பிரியம்
மகத்தானது

கூடவே சொல்லுவார்
வாழ்க்கை ஒரு
கணக்கு மாதிரி
அத தப்புவராம
போடப் பழகு

ஒவ்வொரு நாளும்

நீ சொன்ன
ஒரு நாள்
எந்நாள்
என்று
அந்நாள்
பார்த்துக் கிடக்க
போய்க்கொண்டிருக்கிறது
ஒவ்வொரு நாளும்

சேமித்தல்

நீங்கள் எறிந்த
எல்லா கற்களையும்
சேமித்து வைத்திருக்கிறது குளம்

அது தந்த
எல்லா புன்னகைகளையும்
சேமித்து வைத்திருக்கிறீர்களா நீங்கள்

உனக்கான வரிகள்

1-

வலிக்கச் செய்யும்
உன் எல்லா
வார்த்தைகளையும்
மருந்தாக்கிக் கொள்கிறேன்

நோயாளியாக வெளியேற
விருப்பமில்லை

2-

நீளும் இரவில்
ஓடும் கணங்களில்
உன் நினைவுகள்
பயணிக்கிறது

கண்மூடும் போதெல்லாம்
அதன் குளம்படிச் சத்தம்
எழுப்பி விடுகிறது

3-

ஆடிச்செல்லவில்லை என்று
பொய் சொல்லாதே
இதயத்தில் கிடக்கிறது
உன் ஒற்றைக் கொலுசு

4-

பின்னிரவில் வந்து
எழுப்பிவிட்டுச் சென்றாய்
உனக்குத் தெரியாது
முன்னிரவும் நான்
தூங்கவில்லை என்று

5-

மழைபற்றி
எழுதச் சொல்கிறாய்
நனைந்து முடிந்தேன்

6-

உன் புன்னகையை
முத்தமிட ஆசை
முடியுமா

7-

உன் கண்களின்
ஒற்றைத் துளியில்
அன்பின் பிரமாண்டம்

9-

உன் வீட்டில் வைத்திருக்கும்
கொலு பார்க்க
நான் வரவில்லை என்று
அம்மாவிடம்
கோபித்துக் கொண்டாயாம்

பொம்மைகளும் பொம்மைகளும்
நிறைந்த இடத்தில்
உன்னைப் பார்க்க
விரும்பவில்லை

9-

நீ படிக்கும்போது
உன்னை மிருதுவாய்
தடவிக் கொடுக்கும்
இந்த வார்த்தைகள்
நீ மறக்கும் போது
மெதுவாய்
வழிப்போக்கனைப்போல
வெளியேறிவிடும்

10-

நீ எனக்கும்
நான் உனக்கும்
சொல்லாதவை
சொல்லாதவைகளாக
இருந்துவிட்டுப்
போகட்டுமே

பயணம்

எறும்புபோல்
என்னை
இழுத்துச் சென்றாய்
எங்கே என்றேன்
உன் இதயத்துக்கு என்றாய்

இசை

புல்லாங்குழலில்
மூங்கில் சேமித்த
இசை

நீண்ட பாதை

நீண்ட பாதை
நிழலில்
ஒதுங்கிய பாட்டி
காலில் தைத்த
முட்களை
எடுக்கிறாள்

எட்டி பார்க்கும்
ரத்தத் துளிகளை
சிதறிக் கிடக்கும்
பூக்களால்
துடைக்கிறாள்

அன்பின் குறிப்புகள்

1-
உன்னிடம்
இருக்கும் என்னை
விடுவிப்பாயா

2-

தெரிந்து கொண்டேன்
என் அன்பில்
உன் அன்பிருப்பதை

3-

உன் கண்களில்
அன்பின் வன்முறை
சொல்
இது எதுவரை

4-

என்ன பரிசு
உனக்குத் தரலாம்
கேள்விக்கு கிடைக்கவில்லை
பதில்கள்
பரிசுக்குத் தேவையில்லை
கேள்விகள்

5-

நீ அருகில் இல்லை
அனாதையாய் விழுகிறது
கண்ணீர்

6-

உன் முகம் துடைத்த
கைக்குட்டையில்
புன்னகைகள்
தேடாதே
என்னிடமே இருக்கட்டும்

உன் பெயர்

உன் பிரியங்களின்
கூட்டுத் தொகையை
எப்படிப் போட்டுப் பார்த்தாலும்
சரியாக வரக்காணோம்

எண்களுக்கு பதில்
உன் பெயரே
முன்வந்து
சிரிக்கிறது