நீந்தும் முத்தம்

தலையணையில் நீந்தும் முத்தம்
என்று நான் அனுப்பிய குறுஞ்செய்திக்கு
அன்பு முத்தங்கள் என்று
பதில் அனுப்பி இருந்தாய்

நீந்திய முத்தம் மீனானது
தலையணை மீன்தொட்டியானது

எழுதுதல்

எனக்குத் தெரியும்
உன் மெளனத்தில்
என்னைப் பற்றிய குறிப்புகளை
எழுதிக் கொண்டிருக்கிறாய்

கட்டளை

அப்பாவின்
கட்டளைகள் மேல்
ஏறி விளையாடும் குழந்தை

அன்பின் நிறம்

குதித்து குதித்து
எல்லோரையும்
கூட்டி வந்து காட்டிய
குழந்தையின்
வானவில்லில் இருந்தது
அன்பின் நிறமும்

வழியே

சொற்கள் கூடிக்கிடக்கும்
உன் மெளனத்தின் வழியே
போய் வருவது
கடினமாக இருக்கிறது

திரும்புகிறேன்

என் தயக்கம்
பிடித்திருக்கிறது என்றாய்

எதையும் சொல்லாமல்
திரும்புகிறேன்

பிரிவின் வலிகள்

பிரிவின் வலிகளுக்கு
சந்திப்புகள் மருந்தாகிறது என்றேன்

சந்திப்பும்
ஒருவித வலி
எனச்சொல்லி சிரிக்கிறாய்