இருந்து
விளையாடு
காய் நகர்த்தும் காலம்

கண்களின் கோரிக்கை

நாம் பேசிய பிறகும்
பேச வேண்டும்
இதுதானே உன்
கண்களின் கோரிக்கை

ஊதி ஊதி

ஊதி ஊதி நீ
பெரிசாக்கிய காதல்
நீர் பந்து ஆச்சி
ஓடி ஓடி
அது காற்றில்
உடைந்தேதான் போச்சி

ஒலிப்பெருக்கி

பேசி முடித்துப் போனார்கள்
எல்லோரும்
ஒலிப்பெருக்கியில்
ஊர்ந்து கொண்டிருந்தது
மெளனம்

மீசை

அம்மாவுக்கு பெரிய மீசை
குழந்தை கிறுக்கிய
புகைப்படத்தில்

...பிய்த்தெறி

உன் கண்களில் இருக்கும்
காதலை பிய்த்தெறி
போய் விடுகிறேன்

இரு

என்னவும் செய்
செய்வதில் நீ இரு

இருக்கிறது

எல்லாமே இருக்கிறது
நீ இல்லாமல்
போய் விடாதே

இடம்

ஏறக்குறைய
இன்னொரு இடத்தையும்
ஆக்கிரமித்து
பயணம் செய்கிறீர்கள்
நிற்பவர்
தன் புன்னகையால்
உங்களைத்
தண்டித்துக்கொண்டிருப்பது
தெரியாமல்

நடை

காலை நடையில்
வணக்கம் சொல்லி
மறைந்து போனது
ஒரு நண்டு

நூலின்றி...

நூலின்றி பறக்கிறது
வானம் கிழித்து
செய்த பட்டம்

ஒன்றிலிருந்து

உன் புன்னகை
உதிர்கிற
சின்ன வார்த்தைகளில்
கட்டமைக்கப்படுகிறது
இந்த கவிதை

...கனவில்

சின்ன சதுரத்துக்குள்
முடியும் வீடு
முயல் வளர்க்கிறேன் கனவில்

நீ...

கனவில்
கவிதைத் தடங்கள்
நீ நடந்து போயிருக்கிறாய்

முதல் தேநீர்

பொன் துகள்
விடியலையும்
சேர்த்துக் கலக்கி
குடிக்கிறேன்
நாளின் முதல்தேநீரை

மீதி வார்த்தைகள்

இந்த வார்த்தை மட்டுமே
எனக்குத் தெரியும்
மீதி வார்த்தைகள்
கவிதைக்குத் தெரியும்

புள்ளிக்குள்ளே...

இந்த புள்ளிக்குள்ளே
இருக்கிறது
நான் கடக்க இருக்கும்
மலை

...பார்த்து

பறிக்க நினைத்த கை
திரும்புகிறது
பழத்தின் புன்னகை பார்த்து

...பெருமழை

அசுர பசியுடன்
பெருமழை
ஆஸ்ட்ரேயில்
குவியும் சிகிரெட்
தட்டச்சில்
படபடக்கும்
முடியாத கவிதை

.....

எதுவுமில்லை
நம்பிக்கையற்றவன்
நாட்குறிப்பில்

நினைவுகள் தீர்ந்தபாடில்லை

உன்னை
மறந்து கொண்டிருக்கிறேன்
நினைவுகள் தீர்ந்தபாடில்லை

கிழிந்த பக்கங்கள்

குப்பை பொறுக்கும் சிறுவன்
எழுத்துக் கூட்டிப்படிக்கிறான்
பொறுக்கிய காகிதத்தின்
கிழிந்த பக்கத்தை

கை அள்ளும் நீர்

கை அள்ளிய நீரில்
கடவுளும் இருந்தார்
தன் தாகத்தைத்
தீர்த்துக்கொள்ள

அன்பின் அகராதி

வெட்டிய மரத்தை
கூறு போட்டார்கள்
நிறைய மரணங்கள்
-----
மீன் படிக்கும் கடல்
முடியவில்லை
தண்ணீர் பக்கங்கள்
------
ஒவ்வொரு முறையும்
ஒரு புன்னகை தருகிறாய்
உருவாகிறது
அன்பின் அகராதி
------

...கயிறு

தற்கொலை
செய்துகொள்ளும் முன்பே
இறந்து போனேன்
ஏமாற்றத்துடன் பார்க்கிறது
தூக்குக்கயிறு

சிங்கமும் சுண்டெலியும்

சிங்கம் தூங்காது
சுண்டெலிதான் தூங்கும்
நீ சிங்கமா சுண்டெலியா
மகனிடம் கேட்டேன்
உடனே சொன்னான்
நிறைய சிங்கம்
கொஞ்சம் சுண்டெலி

வெள்ளை தாளில்...

எழுதாத கவிதையிலிருந்து
உதிர்ந்துகொண்டே இருந்தன
வார்த்தைகள்
முற்றாக வடிந்த
வெள்ளை தாளில்
படபடக்கும் நிசப்தம்

என்னை
நகர்த்தும்
நான்

...என்றாள்

என்னை உனக்கு
எதற்காக பிடிக்கிறது
கேட்டேன்
காரணங்களை சொல்ல
பிடிக்கவில்லை என்றாள்

குழந்தை ஆனந்ததில்
பெரிதாகும் பலூன்
அச்சம் எனக்கு

...காலண்டர் பெண்

ஒன்று
இரண்டு மூன்று
நான்கு
ஜந்து ஆறு ஏழு
எட்டு
ஒன்பது
பத்து என
தொடரும் சிகிரெட்டுகளுடன்
முடிகிறது
பகல்பொழுது
இருமலின் அதிர்வை
கேட்டபடி ஆஸ்ட்ரே
விரைத்த கண் பார்க்க
எப்போதும் போல்
காமம் வீசுகிறாள்
காலண்டர் பெண்
காற்றில் அசைந்து

இந்த முறை...

இந்த முறையும்
விழுந்தேன்
சென்ற முறையை விட
வேகமாக எழுந்தேன்