யுத்த தர்மம்

போரில்
நீங்கள் எத்தனை பேரை
கொன்றிருப்பீர்கள்

கணக்கெதுவும் இல்லை
சுமார் ஐம்பது…அறுபது…

நல்லது
போரும் மரணங்களும்
என்ற தலைப்பில்
உங்களின் நிகழ்வுகளை
ஒவ்வொரு வாரமும்
எழுத முடியுமா

மன்னிக்கவும்
ஒருமுறை கொன்றவர்களை
மீண்டும் கொல்வதென்பது
என் யுத்த தர்மத்திற்கு
எதிரானது

யாரோ எறிந்த கல்

பறவையின் மொழியில் நானும்
என் மொழியில் பறவையும்
பேசிக் கொண்டிருந்தோம்
யாரோ எறிந்த கல்
வார்த்தைகளை
கலைக்கும் வரை

அவளுக்கான வரிகள்

1-

அன்பின் துளி
போதும்
நீந்தி மகிழவும்
நிறைவாய்
கரையேறவும்

2-

ஒற்றை வரி
கவிதைபோல
புன்னகைக்கிறாய்
இதில் என்னால்
படிக்க முடிகிறது
நிறைய பக்கங்களை

3-

அப்போதுதான்
உன் சொற்களில்
பனித்துளிகள் ஒட்டி
இருந்ததைப் பார்த்தேன்

அதுவரை
இருந்ததற்காக
நன்றி சொன்னேன்

4-

பிறகு அவர்கள்
முத்தத்தின் குழந்தைகள்
ஆனார்கள்

அறிமுகம்

கடவுளிடம்
என் நட்பை
சொல்லிக்கொண்டிருந்தேன்
உன்னை அறிமுகப்படுத்திவிட்டு
மறைந்து போனார்

நடுநிசியில்

நடுநிசியில்
விழித்தெழும் முத்தம்
கேட்கிறது
நீ எங்கே என

குறிப்புகள்

இமை மூடிப் படிக்கிறேன்
மனதிற்குள்
நீ எழுதிவிட்டுப் போன
குறிப்புகளை

நதி போகிறது

நதி போகிறது
நதி போகிறது
நிற்காமல் போகிறது

நதி போகிறது
நதி போகிறது
நிற்காமல் போகிறது
என்னை நிற்கவிடாமல்

நதி போகிறது
நதி போகிறது

உனக்கானது

1-

சுமந்து சுமந்து
வலிக்கிறது
இறங்கு
கனவிலிருந்து

2-

ஒற்றை உயிர்
எத்தனைமுறை
கொல்வாய்

வரைபடம்

1-

அன்பின் வண்ணங்களில்
உருவாகிறது
புன்னகையின் வரைபடம்

2-

புல்லாங்குழலின்
இசை கேட்டு
அசைகிறது மூங்கில்

3-

சென்ற அலை
திரும்பியது
திரும்பிய அலை
சென்றது

விட்டு விட்டு

அறையைத் தாழ்பாளிட்டு
தற்கொலை செய்தேன்
பின் கதவைத் திறந்து
வெளியேறினேன்
தற்கொலையை
விட்டு விட்டு

பயணத்தின் நடுவே...

1-

எந்த இசைக்குள் அடங்கும்
இந்த மழையின்
சத்தம்

2-

நண்பன் சொன்ன கவிதை
பாடல் போல் ஒலிக்கிறது
பயணத்தின் நடுவே

3-

அழுகை நிறுத்திய
குழந்தையின் கன்னத்தில்
பிஞ்சுத்துளி சிரிக்கிறது

4-

கண் விழித்த சொல்
உறங்கிக் கொண்டிருக்கலாம்
ஏதோ ஒரு
கவிதையில்