அந்த அறையில்...

அந்த அறையில் ஒரு பியானோ இருந்தது

அதில் காலத்தின் தூசி படிந்திருந்தது

வாசிக்கத்தெரியாத ஒருவன் இருந்தான்

அவனோடு ஒரு நாய் இருந்தது

கூடவே இறந்துகொண்டிருக்கும் ஒரு முதியவள் இருந்தாள்

அவள் குளிரை தன் நடுக்கத்தால் விரட்டிக்கொண்டிருந்தாள்

அவன் பசித்த விரல் பியானோ கட்டையில் மோத
சத்தம் வருகிறது

உயிர் இருக்கிறது உயிர் இருக்கிறது என்று அவன் கூவியபடியே
முதியவளை சுற்றி வருகிறான்

நாய் குரைக்கிறது

அவள் இறந்து கொஞ்ச நேரமாகிறது