சொல்லுதல்

ஆன்மாவில் ஏற்றிய கற்பூரம்
அணையவில்லை
சுடர்விட்டு எரிகிறது
உன் பெயரை
சொல்லியபடி

குருதி

எங்கள் குருதியை
நீங்கள் குடித்துக் கொண்டிருக்கிறீர்கள்
எங்கள் ஆயுதங்கள்
உங்களைப்
பார்த்துக் கொண்டிருக்கின்றன

மிகச் சிறிய கதை

இப்போது நான் உன்னை
கொல்லப் போகிறேன்
உன் கடைசி ஆசை
என்ன சொல்

சீக்கிரம்
கொன்றுவிடுங்கள்

எதுவுமற்று

உரையாடினோம்

உன் வார்த்தையின்
வழிபிடித்து
எங்கோ போனேன்

எதுவுமற்ற அந்த வெளியில்
மிதந்தது இதமாக இருந்தது

எதுவுமற்று

சத்தமிட்டாய்

எல்லாம் அறுபட
உன் எதிரில்
அமர்ந்திருந்தேன்

எதுவுமற்று

அறுந்ததை தேடும்
பிள்ளையின் அழுகுரல்
என்னுள் கேட்டபடி

ரகசியம்

நீ என்னை அணைத்த போது
உன் காதில்
நானொரு ரகசியம் சொன்னேன்

சரியாக புரியவில்லை என்று
மேலும் அணைத்தாய்

மேலும் அணைத்தாய்

மேலும்

நான் ரகசியம் மறந்து போனேன்

நாம்

நாம் சேர்ந்து
தூக்கி எறிந்தோம்
காதலை

விழுந்து
உடைந்து போகட்டும் என்று

பிடித்துக் கொண்ட
பிரபஞ்சம் சொன்னது

நீங்கள் திரும்ப
கேட்கும்போது
தருகிறேன் என்று

யாத்ரீகன்

உன் பெயரிலிருந்து
தூறும் அன்பில்
நனைந்து போகிறேன்
பெயரற்ற
யாத்ரீகனைப் போல