நீ வந்த போது

நீ வந்த போது 

நான் உறங்கிக் கொண்டிருந்தேன் 

அருகில் வந்து

மூச்சுக் காற்றால்

ஒரு குறிப்பெழுதிவிட்டுப் 

போய் விட்டாய்

உன் வீடு

நான் வந்து சேர்ந்த 

இடத்தில் 

உன் வீடு இருந்தது 

பின் அது 

தொலைவாகிப் போனது 

வேறு பதில்

வேறு பதிலோடு 

நீ வரக்கூடும் 

என் கேள்வி உடைந்து 

அழக்கூடும்

வாசனை

உன் கண்களில் 

காதல் வாசனை 

முகர்ந்து பார்த்தா 

சொல்கிறாய் 

உணர்ந்து பார்த்து 

சொல்கிறேன்

பின் அட்டையில் சிரிக்கும் பெண்

பின் அட்டையில் 

சிரிக்கும் பெண்ணை 

எங்கோ பார்த்திருக்கிறேன் 

என்ற மயக்க உணர்வோடு 

மேலும் ஒரு முறை 

பார்க்கிறேன் 

இன்னும் ஒரு முறை 

சிரிக்கிறாள்

உன் சாலையில்

நீ இல்லை என்று 

தெரிந்தும் 

பார்க்க வந்தேன் 

உன் சாலையில் 

திரும்பிப் போவது 

உன்னைச் சந்தித்துப் 

போவது போல் 

சந்தோஷம் தருகிறது

சொற்கள்

எனக்கான சொற்கள் 

உன்னிடமும் 

உனக்கான சொற்கள் 

என்னிடமும் 

இருக்கின்றன 

நாம் ஏன் 

பேசாமல் இருக்கிறோம் என்று 

தெரியவில்லை