குழந்தையும் நிலவும்

1-
சின்ன கண்ணாடிக்குள்
கொஞ்சம் கொஞ்சமாய்
முகம் பார்க்கிறது குழந்தை

குழந்தையின்
மொத்த முகத்தையும்
தனக்குள்
கொண்டுவரப் பார்க்கிறது
கண்ணாடி

2-

தன்னைக் காட்டி
குழந்தைக்கு
சோறு ஊட்டியதைப்
பார்த்துக்கொண்டிருந்தது நிலவு
பின் தன்
ஒளி நாக்கை நீட்டி
அதுவும் கொஞ்சம்
அம்மாவிடம்
வாங்கிக்கொண்டது

யாருமில்லை

யாருமில்லாத வீதியில்
நீ நடக்கிறாய்
எனை நினைத்து

நீ இல்லாத கவிதையை
நான் கடக்கிறேன்
உன் நினைவை
துணைக்கழைத்து

தெரிதல்

நினைவில் உன்னை
வரைந்து பார்த்தேன்
கோடுகளற்ற
உருவமாய்த் தெரிந்தாய்

நன்றி

நீ அணைத்தபோது
துளி கண்ணீர் வந்து
நன்றி சொன்னது உனக்கு

வீடெங்கும்...

வீடெங்கும்
விளையாடுகின்றன நிறங்கள்
குழந்தை வரைந்த வானவில்

நடனம்

உன் கண்கள்
வரைந்து போன
மெல்லிய கோடு
மின்னுகிறது காற்றில்
வளைந்து நெளிந்து
நடனமிட்டபடி

புல்லாங்குழல் கண்கள்

1-

கிடார் இசைக்கும் மழை
கேட்கலாம்
பார்க்கலாம்
புல்லாங்குழல் கண்களால்

2-

பயணம்
ரயில்
புத்தகமானது

3-

இளைப்பாறும் நிழலை
வெட்டுகிறான்
வெயில் தீண்ட