உனது பதிவுகள்

1-

நீ பிறந்த நாளின்று
நான் ரத்தம் கொடுத்தபடியே
உனக்கான கவிதையை
யோசித்துக்கொண்டிருக்கிறேன்

2-

நம் அருகில் அமர்ந்திருந்த
பார்வையற்ற தோழர்
சொல்லிச் செல்கிறார்

என்னால் உங்கள் காதலைப்
பார்க்க முடிகிறது

3-

இனிப்பை விட்டுவிட்டு
உன் பெயரை
இழுத்துப் போகின்றன
எறும்புகள்

உனக்கானவை

1-

உன் சிரிப்பின்
கைப்பிடித்துப் போகின்றன
நினைவுகள்
இங்கேயே நிற்கிறேன்
அது வந்து
சொல்லப் போகும்
கவிதைக்காக

2-

அந்நியமாக
நீ கடந்து போகிறாய்

வழி நட்பாக
நான் மிதந்து போகிறேன்

உன்னை நோக்கி...

இனிப்புகளும் தித்திப்புகளும்
என்னை
திசைத் திருப்பலாம்

உன் கசப்பின்மையே
உன்னை நோக்கி
என்னை வரச் செய்யும்

குறுஞ்செய்திகள்

நீயில்லை
உன் குறுஞ்செய்திகள்
விழுந்து குதிக்கிறது
என்மேல்

நிகழ்தல்

நான் பேசுவது
பிடிக்கும்போது
புன்னகைக்கிறாய்
இல்லாதபோது
மெளனமாகிறாய்
புன்னகைக்கும் மெளனத்திற்கும்
இடையில் நிகழ்கிறது
உன் உரையாடல்

விரிதல்

புள்ளியாய்
வரைந்த பறவை
விரிகிறது
தாளை ஆகாயமாக்கி

ஒரு மதியத்தில்

ஒரு ஞாயிறு மதியத்தில்
நீயும் நானும்
பேசிக்கொண்டிருந்தோம்
பின் பேசியதைக்
கேட்டுக் கொண்டிருந்தோம்