உரையாடல்

உரையாடலைத் துவக்கி வைக்க 

சக்கரை இல்லாதக் காப்பியைத் தருகிறாய்

உரையாடலை முடித்துக் கொள்ள 

அமைதியாகக் குடிக்கிறேன்

கிளம்பும் போது கேட்கிறாய்

காப்பியில் சக்கரை எல்லாம் 

சரியாக இருந்ததா என்று

நான் காப்பி நன்றாக இருந்தது 

என்கிறேன்

இந்த வரியின் சுவையில் 

நீ மெளனமாகிறாய் 

நான் வெளியேறுகிறேன்

உன்னை

விரிந்து கிடக்கும் 

வெள்ளைத்தாளில் 

எங்கே இருக்கிறாய் 

என் எழுத்து 

தேடத் தொடங்குகிறது 

உன்னை

நீர் வானவில்

உள்ளங்கையில்
உன் பெயர்
மழையில் அழிய
நீர் வானவில்

அலை

தெரியாத அலை 

கால் நனைத்தது

உன்னைத் தெரியும் என்றது

பின் போனது

நனைந்தது மழை

நனைந்து போகாமல் 

என்னை அழைத்துப் 

போவாயா மழையே 

நனைந்தது மழை 

மழலையின் 

சொல் கேட்டு.

அப்பா சட்டை

அப்பா சட்டையைப்

போட்டு வந்து 

காட்டுகிறது குழந்தை

தன்னை இளமையாகப் 

பார்க்கிறார் அப்பா 

சுமத்தல்

நீ மறந்து போன கனவை 

நான் இறந்து போக விடாமல் 

சுமந்து செல்கிறேன்