பென்சில் நதி

Friday, November 25, 2011

உன் பெயரையும்
என் பெயரையும் சேர்த்து
எழுதிப் பார்க்கிறேன்
பாடலின் பல்லவியைப் போல
அழகாகத் தெரிகிறது

ஊரிலிருந்து கிளம்பும்போது
வருகிறேன் என்கிறது
ஊரும்

நள்ளிரவில் தற்கொலை
செய்துகொள்ளப் போகிறவன்
கடைசியாக
ஒரு முறை பார்க்கிறான்
நட்சத்திரங்களை

பல வருடங்களாக
பக்கத்து வீட்டிலிருந்தவர்
அறிமுகமானார்
பிணமாகப் போனபோது

சிந்தி வழியும்
உன் சிரிப்பில்
நனைகிறது பூமி
நானும்

கதையின் முடிவுபடி
நீ இறந்திருக்க வேண்டும்
உயிரோடு இருக்கிறாயே எப்படி
உன் கதையை
உனது சவப்பெட்டியில்
புதைத்து விட்டு
நான் தப்பித்து விட்டேன்

நன்றாக வாசிக்கிறான்
விற்கும் சிறுவன்
அதற்காக ஒன்று
வாங்கிக் கொண்டேன்
எனக்கு வாசிக்கத் தெரியாத
புல்லாங்குழலை