முடிதல்

நீண்ட அழுகையில்
முடிந்திருந்தது
கண்ணீர் மட்டுமே

இடைவெளி

1-

உனது சொற்களில்
நீ நிரம்பி
வழிகிறாய்

2-

எனக்கும் உனக்கும்தான்
இடைவெளி

எனக்கும்
என்னுள் இருக்கும்
உனக்குமல்ல

சொற்கள்

சுவையான உரையாடல்
தேநீர் தந்த
சொற்களுடன்

கோடுகள்

கோடிட்ட இடங்களை நிரப்ப
வார்த்தைகள் இல்லை
நிரப்புகிறேன்
கோடுகளாலேயே

எளிது

என்னைத் திறப்பது
எளிதானது
உள்ளிருந்து
நீ வந்தால்
போதும்

ரயில்கள்

எந்த ரயிலும்
இங்கு நிற்பதில்லை

எல்லா ரயிலிலும்
நீ இருக்கிறாய்

நீந்தும் முத்தம்

தலையணையில் நீந்தும் முத்தம்
என்று நான் அனுப்பிய குறுஞ்செய்திக்கு
அன்பு முத்தங்கள் என்று
பதில் அனுப்பி இருந்தாய்

நீந்திய முத்தம் மீனானது
தலையணை மீன்தொட்டியானது