உனது அதிர்வுகள்

1-

மொழி கலப்பில்லாத
மெளனத்திலிருக்கிறது
கவிதையின் மொழி

2-

நீ தந்து சென்ற வலி
தள்ளும்போதெல்லாம்
சாய்ந்து விடுகிறேன்
உன் நினைவின் மீது

நீங்கள்

இந்த அரங்கில்
முக்கியமாக
கருதப்படும் நீங்கள்
என்னைத் தவிர்க்கவே விரும்புகிறீர்கள்

இருந்தும்
ஒரு கணம்
பார்த்துவிடுகிறீர்கள்

அதிலிருந்து மீள்வதற்குதான்
உங்களுக்கு
நிறைய கனங்கள் தேவைப்படுகிறது

கூடவே
உங்கள் எச்சரிக்கை உணர்வின் மீது
கோபமும் வருகிறது

மூதாட்டி

யார் துணையுமின்றி
கைத்தடியால் தன்னை
அழைத்தபடி
கவனமாய்த் தண்டவாளத்தைக்
கடந்து விடுகிறாள் மூதாட்டி

தொடர்ந்து செல்லும்
ரயிலிலும்
பயணிக்கிறாள்
தன்னைப் பார்த்து
கையசைத்தபடி

தகவல்

காமத்தில்
சிக்கிக்கொண்ட
காதலை
வந்தெடுக்க
உதவுவாய் என
காத்திருக்கிறேன்

போகிறாய்
சதிகாரி
தள்ளிவிட்டது
நான்தான் என்ற
தகவலைச் சொல்லி

இருக்கிறேன்

தனியேதான்
இருக்கிறேன்

தனிமையோடுதான்
இருக்கிறேன்

அதனாலென்ன
இருக்கிறேன்

துளிர்த்தல்

உன் வீட்டு
பால்கனியில்
துளிர்த்திருக்கிறது
என் பிரியம்

போய்ப் பார்

நீருற்று

வெறும் செடி
என நினைத்து
விட்டுவிடாதே
வெயிலில்

நிகழ்வுகள்

தாயிடம்
தொலைந்த குழந்தையை
ஒப்படைத்தேன்

சிரித்தபடியே
கையசைத்தது

திரும்ப நடந்தபோது
எதுவோ
தொலைந்தது போலிருந்தது