அவ்வளவுதான்

நீ என்னை வந்தடைய 

எத்தனையோ 

பாதைகள் உள்ளன 

இன்னும் 

ஒரே ஒரு பாதை

உன் மனதிலிருந்து 

உருவாக வேண்டும் 

அவ்வளவுதான்

எவ்வளவு தூரம்

உன்னிடமிருக்கிறது
பிடிவாதம்
என்னிடமிருக்கிறது
வைராக்கியம்
இதை வைத்துக்கொண்டு
எவ்வளவு தூரம்
பயணம் செய்யப் போகிறோமோ
தெரியவில்லை 

விளிம்பில்

உன் எதிர்பார்ப்பையும் 

என்னால்

பூர்த்தி செய்ய முடியவில்லை 

என் எதிர்பார்ப்பையும் 

என்னால் 

பூர்த்தி செய்ய முடியவில்லை 

ஆனாலும் 

விளிம்பில் நின்று 

பேசிக் கொண்டிருந்தோம்

குதித்து விடாமல்

உனக்கும் கேட்கும்

அன்பால் அடைந்து விடலாம் 

என்று யாரோ 

எழுதிவிட்டுப் போன வரியை 

உரக்கப் படிக்கிறேன்

உனக்கும் கேட்கும் என 

விடாமல் பெய்யும் கனவு

விட்டு விட்டுப்
பெய்யும் மழை
விடாமல்
பெய்யும் கனவு
இந்த உன்
குறுஞ்செய்தியில்
நீ
மழையாய்
கனவாய்
நானாய் 

யாருக்கும் தெரியாமல்

யாருக்கும் தெரியாமல் 

உன் இருக்கைக்கு 

நான் வைத்து விட்டு 

வந்த முத்தம் 

உன்னோடு 

பயணம் செய்யக் கூடும் 

நான் கடலாகிறேன்

உள்ளங்கையில் 

முத்தம் வைக்கிறாய் 

அது கப்பலென 

நகர்கிறது 

நான் கடலாகிறேன்