போய்விடு

என்னால் வந்து உன்னை
வழி அனுப்பி வைக்கமுடியாது

கையசைப்பு
கண்ணீர்
பிரிவு
வலி
என்னால் தாங்க முடியாது

என்னிடம் சொல்லாமல்
எனக்குத் தெரியாமல்
கிளம்பிப் போய்விடு

இந்த தடத்தில்

உனது வரியும்
எனது வாக்கியமும்
தண்டவாளங்களாயின
நமது உரையாடல்
பயணிக்கத் தொடங்கியது
இந்த தடத்தில்

உன் கண்களில்

1-

மழை பிழிந்து
செய்த இசை
உன் குரல்

2-

உன் கண்களில்
பதில்
இருக்கிறது

பசி

நமக்கு
வேறு வேறு
பசிகள்
அவர்களுக்கு
வயிற்றுப் பசி
மட்டும்தான்

ஒன்றுதான்

அங்கிருக்கும் நீயும்
இங்கிருக்கும் நீயும்
வேறுவேறல்ல
ஒன்றுதான்

சில வரிகளில்

சில வரிகளில்
நீ சொல்லிவிட்டுப்
போய்விடுகிறாய்
நான்தான் மொழியிடம்
தோற்றுக்கொண்டிருக்கிறேன்

இதுவே

இதுவே
கடைசி சந்திப்பாக இருக்கலாம்

பூங்கொத்துக்களை
தந்து செல்ல விருப்பமில்லை

உன் தோட்டத்தில்
விதைகளை நட்டுச் செல்கிறேன்