பென்சில் நதி

Monday, November 7, 2011

பல வருடங்களாக
பக்கத்து வீட்டிலிருந்தவர்
அறிமுகமானார்
பிணமாகப் போனபோது

சிந்தி வழியும்
உன் சிரிப்பில்
நனைகிறது பூமி
நானும்

கதையின் முடிவுபடி
நீ இறந்திருக்க வேண்டும்
உயிரோடு இருக்கிறாயே எப்படி
உன் கதையை
உனது சவப்பெட்டியில்
புதைத்து விட்டு
நான் தப்பித்து விட்டேன்

நன்றாக வாசிக்கிறான்
விற்கும் சிறுவன்
அதற்காக ஒன்று
வாங்கிக் கொண்டேன்
எனக்கு வாசிக்கத் தெரியாத
புல்லாங்குழலை

வீடு நிறைய பொம்மைகள்
கவலையுடன்
ஊருக்குப் போயிருக்கிறாள் குழந்தை

உனக்கு நான்
அனுப்பி இருப்பது
உன் புன்னகையில்
செய்த பூங்கொத்து

ஆகாயம் வரைந்தால் போதும்
மழை பெய்யும்
சொல்கிறாள் குழந்தை