அசைத்தல்

நான் வானத்தை அசைக்கிறேன்
நட்சத்திரங்கள்
விழுகிறதா பாருங்கள்
சொன்னாள் சிறுமி

அப்போது அவள் அசைத்த
மரத்திலிருந்து விழுந்தன

சில பழங்களும்
கூடவே
நட்சத்திரங்களும்

இல்லாத பழம்

இல்லாத பழத்தை எடுத்து
ஒவ்வொரு சுளையாய் உரித்து
தின்கிறாள் சிறுமி
இருக்கும் தன் பசிக்கு

பசியை வெற்றிகொள்ள
ஒவ்வொரு முறையும்
தோற்றுப் போகாத
இந்த பாவனையை
செய்தபடி இருக்கிறாள்

அப்பா வீடு திரும்ப
இன்னும் நேரமிருக்கிறது

ஒரே ஒரு காரணம்

என்னைத் தவிர்ப்பதற்கு
ஆயிரம் காரணங்கள்
வைத்திருக்கிறாய்
ஒரு வேண்டுகோள்
ஆயிரம் காரணங்களையும்
தவிர்ப்பதற்கு
ஒரே ஒரு காரணம்
கண்டுபிடியேன்

உன் மேஜையில்

உன் மேஜையில்
நீண்ட நாட்களாக
படிக்கப்படாமல்
இருக்கும் புத்தகத்தைப் போல
உன் இதயத்தில்
நீண்ட நாட்களாக
பார்க்கப்படாமல்
இருக்கிறேன் நான்

வழிப்போக்கன்

1-

மழை இறங்கும்
கனவில்
நீ போகிறாய்
நனையாமல்

2-

எங்கோ தொலைந்த
நதி
ஈரம் மறக்காத
மணல்

எங்கோ தொலைந்த
நீ
பாரம் இறக்காத
நான்

3-

உன் வழிகளில்
நடந்து கொண்டிருக்கும்
நானொரு
வழிப்போக்கன்

கோடுகள்

வெறும் கோடுகள் மட்டுமே
வரையத் தெரிந்தவனை
அவர்கள் ஓவியன் என்றார்கள்

பிறகு அவனை
வரையச் சொன்னார்கள்

கோடுகளுக்கிடையில்
ஓவியங்கள் இருக்கின்றன
பாருங்கள் என்றான்

அவர்கள் கோடுகளில்
தேடிக்கொண்டிருந்தார்கள்

அவன் கோடுகளில்
தாவிக் கொண்டிருந்தான்

வரியின் மேல்

இந்த வரியின் மேல்
பூத்திருக்கிறது பூ

முளைத்திருக்கிறது
பனித்துளி

வளர்ந்து கொண்டிருக்கிறது
கவிதை