பிரிவின் வலிகள்

பிரிவின் வலிகளுக்கு
சந்திப்புகள் மருந்தாகிறது என்றேன்

சந்திப்பும்
ஒருவித வலி
எனச்சொல்லி சிரிக்கிறாய்

சந்தேகம்

சந்தேகத்தை
தீர்த்துக்கொண்டவன்
சொன்னான்

புறா ரத்தம்
வெள்ளையாக இல்லை

கண்களிலிருந்து

1-

தூறல் போன வீதியில்
அழியாமல் உன்
காலடித் தடங்கள்

2-

மெளனம்
உற்றுப்பார்க்கிறது
உன் கண்களிலிருந்து

இருக்கிறது

பத்திரமாய் இருக்கிறது
என்னிடம்
நீ எடுத்துச் செல்லாத
அன்பு

பட்டாம் பூச்சி

நீ பேசும்போதெல்லாம்
உன் வார்த்தைகளில்
வந்து அமரும்
பட்டாம் பூச்சி
நான் பேசும்போதெல்லாம்
பறந்து போய்விடுகிறது

எது என்று

வானம் பார்த்து
தெரிந்துகொண்டதை
பூமி பார்த்து
புதைத்துவிட்டேன்
வளரும் வேளை
தெரிய வரலாம்
எது என்று
எனக்கும்

அம்மா

அம்மா தன் பசியால்
செய்த உணவை
எங்களுக்கு பரிமாறுகிறாள் என்று
நாங்கள் தெரிந்துகொள்ள
பல வருடங்களாயிற்று