ரப்பர் வார்த்தைகள்

நீங்கள் அழுத்திப் பார்க்கும்போது
அசைந்துகொடுக்கிறது என்பதற்காக
இந்தக் கவிதையை
உச்சியில் கொண்டுபோய்
வைத்துவிடாதீர்கள்

எல்லாமே
ரப்பர் வார்த்தைகள்

முதல் முறை

1-

ஐஸ் கிரீம்
உண்ணும் குழந்தை
வழியும் அழகு

2-

பிரம்பில் கண்டிப்பு
கண்டிப்பில் அன்பு
இதை கூட்டினால்
எங்கள் கணக்கு ஆசிரியர்

3-

என்னைத் தேடாதீர்கள்
இந்த பனித்துளியோடு
மறைந்துகொண்டிருக்கிறேன்

4-

வானவில்
எத்தனை முறை பார்த்தாலும்
முதல் முறை
பார்ப்பது போல

குழந்தையின் படிகள்

குழந்தை
வரைந்த படிகளில்
எல்லோரும்
மாடிக்குப் போய்
வந்தார்கள்
குழந்தை
வானம் போய்
வந்தது

நான்தான்

உன் மொத்தப்
பிரியங்களையும்
ஒற்றைப் புன்னகையில்
சொல்லிவிட்டுப் போகிறாய்
நான்தான்
வனத்தில் தொலைந்த
குழந்தையாய்
வார்த்தைகளைத்
தேடிக்கொண்டிருக்கிறேன்

உலகு

1-
உன் துளி
அன்பில்
ஒளிரும்
என் உலகு

2-

நுனி நாக்கில்
உன் பெயர்
உடலெங்கும்
உன் வேர்கள்

3-

பேனா வழியே
இறங்கிக்கொண்டிருக்கிறாய்
நீ

இப்போது

நட்பை
முறித்துக்கொண்டுபோன
நண்பனுக்கு
இன்று பிறந்த நாள்

அவனுக்காக
நான் எழுதிய
வாழ்த்து அட்டை
மேஜைமேல்

படிக்கிறேன்
அவன் வாங்கி
படிப்பதைப்போன்று

உதிரும் இந்த
கண்ணீர் துளிக்கு
எதுவும் தெரியாது
என்பது மட்டுமே
இப்போது
எனக்குத் தெரியும்

தருணங்கள்

நீ தந்துவிட்டுப்போன தருணம்
தந்துகொண்டிருக்கும் அன்பை
உணர்ந்துகொண்டிருக்கிறேன்
ஒவ்வொரு தருணத்திலும்