மெகா சீரியலும் பார்வதி அக்காவும்

பார்வதி அக்கா
மெகா சீரியல்கள் விழுங்கிய
தனது நேரங்களை
கவலையுடன் யோசித்தபோது
அந்த நினைவுகள்
இன்னொரு மெகா சீரியலாகி
மறுபடியும் அவளை
விழுங்கத் தொடங்கின

கடைசிவரை

பிரயாணத்தில்
கடைசிவரை தூங்கவே இல்லை
சிறுமியும் ரயிலும்

மந்திரவாதியும் குழந்தையும்

மந்திரவாதி குழந்தையிடம் சொன்னார்

நான் நினைத்தால் உன்னை
என்ன வேணாலும்
ஆக்க முடியும்

சிரித்தது குழந்தை

மறுபடியும் சொன்னார்

சத்தமாய் சிரித்தது

மந்திரவாதி கோபப்பட
குழந்தை சொன்னது

என் சிரிப்பை
அழுகையாக மாற்று

வேகமான மந்திரவாதி
என்னவெல்லாமோ பயமுறுத்தி
குழந்தையை
அழவைக்கப் பார்த்தார்

குழந்தையின் சிரிப்பில்
கூடிக்கொண்டே போனது
பிஞ்சு இசை

கடைசியில்
எல்லாம் மறந்து
குழந்தையுடன் சேர்ந்து
சிரித்தபோது
குழந்தையானார் மந்திரவாதியும்

மழைச் சிறுமி

பள்ளிக்கூட மணி அடிக்க
மழை பெய்தது
எல்லோரும் ஓடினர்
ஒரு சிறுமி
மெதுவாக
மிக மெதுவாக
எடுத்துக் கொண்டிருந்தாள்
விழுந்த புத்தகங்களோடு
மழைத்துளிகளையும்

ஒரு குறிப்பு

இறகைப் போல
பின் தொடர்கிறாய்
பறவையைப் போல
விடை பெறுகிறாய்

காத்திருப்பு

காத்திருக்கும் போது
நானொரு
சிலை செய்தேன்

சிலை
கண் திறந்து
கொட்டியது
காதலின் வெப்பத்தை

தண்டித்தல்

என்னை சிறையில்
தள்ளிய கனவை
தண்டிக்க வேண்டும்
வெளியே
கொண்டு போகப்போகும்
கனவிடம் சொல்லி