சாத்தியம்

பறவையின் சிறகில்
ஒளிந்த கனவு
இந்த வரிக்குப் பின்
பறத்தலை
சாத்தியமாக்கியது கவிதை
கனவுடன் சேர்ந்து

யாரும் என்னுடன் இல்லை

1-

எண்களைப் படிக்கும் சிறுமி
இருபத்து மூன்றாவது மாடியிலிருந்து
இறங்கும் லிப்ட்

2-

யாரும் என்னுடன் இல்லை
எழுதிய வரி இருக்கிறது
என்னுடன்

3-

எப்போது படித்தாலும்
புதிதாகவே இருக்கிறது
அப்பாவின் கடிதம்

4-

தனிமையைத்
தின்கிறது
சுவர் பல்லி

5-

சவப்பெட்டி செய்கிறவன்
அதில் விழுந்து மரணிக்கின்றன
வியர்வைத் துளிகள்

6-

மணலில் பிதுங்கிய
வளையல் துண்டு
குத்துகிறது காலில்

7-

அன்புடையீர்
மன்னிக்கப் பழகிக் கொள்ளுங்கள்
என் குற்றங்களை
வெளியிடப் போகிறேன்

8-

என் மேல்
ஏறி நின்று
பார்க்க வேண்டும்
எல்லாவற்றையும்

9-

உடைந்த மீன் தொட்டி
நிதானமாக
பொறுக்குகிறார்கள்

உனக்குள்

நீ எனக்குள்
இருக்கும் வரம்
நான் உனக்குள்
இருக்கும் தவம்

கதை

பாட்டி சொன்ன கதையில்
மழை பெய்தது
கதையில் நனைந்த குழந்தை
மழையைக் கேட்டது

அப்பா

உன்ன விட்டுகூட
இருக்க முடியும்
ஊரவிட்டுட்டு
இருக்க முடியாதுப்பா

வந்த களைப்பு வடிவதற்குள்
கிளம்பிப்போனார் அப்பா

நினைவுகளும் மெளனங்களும்

1-

பூங்காவில் குழந்தைகள்
பெரியவர் கண்களில்
குளமிடும் பால்யம்

2-

சென்ற முறை
விழுந்த நான்
தூக்கிக் கொண்டிருந்தேன்
இந்த முறை
விழாமல் என்னை

3-

அதற்கு முன்பாக
தூக்கு கயிறை
வரைந்து பார்த்தான்
ஊர்ந்த எறும்பை
ஊதித்தள்ளிவிட்டு

4-

காலியான வீடு
நிரம்பிக் கிடக்கும்
நினைவுகளும் மெளனங்களும்

5-

வாசித்தவன் தூக்கத்தில்
புல்லாங்குழல் கேட்கும்
ரயில் சத்தம்

6-

விளையாடுகிறது
குழந்தையின் மழலையில்
நிலவு

7-

முன் ரயிலில் நிகழ்ந்திருக்கிறது
தண்டவாளத்தில்
ரத்தத்தின் வரைபடம்

தாளெங்கும்

அன்புடன் என்று
திரும்ப திரும்ப எழுதி
பேனாவை சரிபார்க்கிறான்

பேனாவை வாங்குபவள்
தன் பெயரை
எழுதி எழுதி பரிசோதிக்கிறாள்

தாளெங்கும்
அன்பும் பெயரும்