மரணப்புகை

சிகிரெட் பிடித்தது அவனை
இடையில்
மரணப்புகை

ரகசிய பயம்

என்னைப் பற்றிய ரகசியத்தை
என்னிடம் சொன்னால் கூட
வெளியில் கசிந்து விடுமோ என்று
பயமாக இருக்கிறது

மூன்றாவது நபர்

ஒரே ரயிலில்
பயணித்தபடி
நீயும் நானும்
எத்தனையோ முறை
பேசி இருக்கிறோம்

நம் மெளனத்தின் போதெல்லாம்
ரயில் சத்தம்
மூன்றாவது நபராக
உரையாடலில்
கலந்து கொண்டிருக்கிறது

இப்போதும்
ரயில் வருகிறது
உன் நினைவில்
என் கனவில்

எந்த ரயிலுக்கும்
தெரியவில்லை
நம்மை
நாம் பேசியதை

ஒரே மழை

அம்மாவிடம் குழந்தைக் கேட்டாள்
அம்மா இந்த மழையும்
போன வார மழையும் ஒன்னா
சட்டென தடுமாறியத் தாய்
போய் படி என்றாள்
அம்மாவிடம் சொல்லிவிட்டு
ஓடினாள் குழந்தை
ஒரே மழைதாம்மா
அதுக்குத் தோணறப்பல்லாம்
பெய்யுது

உன் புன்னகையை
வரைந்து பார்த்தேன்
வானவில் கிடைத்தது

சொற்களின் தழும்புகள்

உன் மெளனம்
எறிந்த கற்களில்
சொற்களின் தழும்புகள்

காதல் வனம்

உன் பிரியத்தை
எழுதலாம் என்று
தாளில்
குவித்து வைத்தேன்
பூத்துக் குலுங்கியது
காதல் வனம்