திரும்புதல்

பட்டாம் பூச்சியுடன்
தொலைந்து போன மனம்
திரும்பி வந்தது
வண்ணச் சிறகுகளுடன்

கடலில் புதைந்த கவிதை

நீங்கள்
மூழ்கி
நீர் குடைந்து
அடைந்தாலொழிய
மீட்டெடுக்க முடியாது
கடலில் புதைந்த
கவிதையை

உன்னைக் கூப்பிடுகிறேன்

மிகச்சுருக்கமாய்
என்ன பேசலாம் என்று
முடிவு செய்த பிறகு
உனனைக் கூப்பிடுகிறேன்
ஒலிக்கிறது
உன் கைபேசி
அந்த ஒலியோடு
சேர்கின்றன என்
வார்த்தைகளும்
நீ எடுக்கவில்லை
துண்டிக்கப்படுகிறது
என்றாலும்
முடிந்திருக்கிறது
என் உரையாடல்

விடுமுறையும் ஊரும்

விடுமுறைக்கு ஊர் வந்து
விடுமுறை ரத்து செய்யப்பட்டு
அவசரமாய் கிளம்பியபோது
அப்பா சொன்னார்
இதுக்கு நீ வராமயே
இருந்திருக்கலாம்
பதில் சொல்லாமல் திரும்பிய
என்னால் ஏமார்ந்திருக்கும்
ஊரும்

கனவைப் போலவே
இருக்கிறது
கனவு காண்பதும்

உனக்கு...

நான் சென்று கொண்டிருப்பது
இருள் நிறைந்த பாதை
என்னிடமிருக்கிறது
உன் ஒளி நிறைந்த புன்னகை
(சுகிக்கு)

முடிவு செய்த பிறகு

போகலாம் என
முடிவு செய்த பிறகு
எல்லாமே உனக்கு
அவசரமாயிற்று

காத்திருக்கலாம் என
முடிவு செயத பிறகு
எல்லாமே எனக்கு
அவசியமாயிற்று